پھر کچھ اک دل کو بیقراری ہے

پھر کچھ اک دل کو بیقراری ہے

سینہ جویائےزخمِ کاری ہے

پھِر جگر کھودنے لگا ناخن

آمدِ فصلِ لالہ کاری ہے

قبلۂ مقصدِ نگاہِ نیاز

پھر وہی پردۂ عماری ہے

چشم دلاّلِ جنسِ رسوائی

دل خریدارِ ذوقِ خواری ہے

وُہ ہی صد رنگ نالہ فرسائی

وُہ ہی صد گونہ اشک باری ہے

دل ہواۓ خرامِ ناز سے پھر

محشرستانِ بیقراری ہے

جلوہ پھر عرضِ ناز کرتا ہے

روزِ بازارِ جاں سپاری ہے

پھر اسی بے وفا پہ مرتے ہیں

پھر وہی زندگی ہماری ہے

(مرزا غالب)